بقلم: أحدهم
مانيش متعود على نظراتك اللي هكا، متعود نرا عينيك تلمع و تفرح كي تراني، مانيش متعود على وجهك العابس هكا، متعود نرا الفرحة مرسومة عليه، مانيش متعود على صوتك الجاف، متعود عليه كالنسمة اللي تدخل قلبي و تخليه يدفأ و يحسسني بحبك، يدك الباردة مش هكا متعود عليها، متعود تشدني من يدي و تكبس عليه ابخوف و حنان، تو ولات شدة باردة فوق من قلبك !
فسرلي علاش متبدل عليا بعد ما وعدتني تكون ليا و على طول تعيش كان معايا، فسرلي شنوة اللي صار بش يخليك تغيرك نظرتك تجاهي و تحسسني بلي راك ماعادش عينك في حتى شيء، بعد ما كنت إنتي اللي تطمني و تشدلي يدي و تقلي لا مانيش بش نخليك و نوعدك بلي طول العمر ليك و بجبنك، و على طول تخليني عايش في حلمة، و أيامات تعداو عليا ما ننساهمش حياتي كاملة، أيامات كنت تطمني بلي ماهوش بش يجي نهار و يمشيو على رواحهم و بلي بش نبقاو نعيشوهم حياتنا كاملة مع بعضنا، ظهرنا غالطين ! فسرلي و قلي علاش، اعطيني تفسير مقنع ...
- صدقني تعبت، بيني و بين روحي نبقى نخمم و نقول إيه و مبعد ؟ هانا مع بعضنا وين عندنا نوصلو، دارنا مرجوني بحكاية العرس وانتي مزلت تكمل في قرايتك، ديما نخمم في المستقبل و نقول شنية ينجم يصير معانا، و شنية الدنيا مخبيتلنا ...
- آني قتلك الكلام هذا برشا مرات في الأول و انتي كنت ديما تطمني و ديما تقلي نتحدى العالم على خاطرك و عمري ما نخليك، شنية اللي تبدل توا؟ شنية اللي خلاك تتراجع في كلامك .. ؟
أنطق تكلم ما تسكتش عليا هز راسك و اغزرلي في عينيا و قلي راك لعبت بنفسيتي كيما حبيت، خليتني نحبك و نعمل المستحيلات على خاطرك وصلت طيشت قرايتي و بقيت معاك وصلت خاطرت بروحي و انتي تعرف عايلتي قداشهم ناس مشكاكين أما ديما انتي تطمني و تقلي ما تخافش هاني معاك، و توا انتي معايا ؟ تو انتي معايا و قاعد تحس في التمنييكة اللي وجعتني بيها؟ قاعد تتذكر في الكلام اللي وعدتني بيه .. برافو بصراحة برافو مثلت عليا و ...
- أسكت.. تبداش تهز و تنفض، تعرفني حبيتك و عشقت و زادة آني عملت المستحيل على خاطرك، أما بلحق راني وصلت لمرحلة تعبت و معادش انجم نزيد نتعب اكثر، انتي ما عندك حتى دخل و ما تتصورش قداش مزلت نحبك و نعشقك، اماً ..
- أما شنوة ؟
- هاني قتلك الظروف كلها ضدنا، و العمر يجري و ماكش عارف عالمستقبل.. و زيد فوق هذا و كلو وين عندنا نوصلو ؟
ليست هناك تعليقات:
إرسال تعليق